Szpajza cytrynowo
Składniki na sztyrech ludzi:
- 3 jajca
- 3 łeżki cukru
- galaretka cytrynowo, szklonka wrawej wody
- potrzyto czekulada, bodzimki, ruzynki (jo nie lubia!)
- likierek do polocio jak kto chce szpajza z prōndym
Galaretka rozpuszczomy w szklonce wrawej wody, nie w 0,5L jak piszom na tytce. Jajca z cukrym ubijōmy szlegrym na piana, ni musi być jakoś fest sztywno. Tyżejōnco galaretka trza pomału wkidać do tej piany i po leku wymiyszać. Miszōng wlywomy do pucharków i drzist do lodówki. Jak styżeje to dobrze je posypać nasz deserek potrzytom czekuladōm abo dać na wyrch bodzimki. Jakby kiery lubiył ruzynki to tyż idzie sypnyć po wyrchu.
Szpajza czekuladowo z gorzołom (abo bez)
Składniki na sztyrech ludzi:
- 4 jajca
- 4 łeżyczki żelatyny
- 4 łeżki ciepłej wody
- 4 łeżki cukru
- ciymne kakao
- potrzyto czekulada do posypanio
- Łeżka gorzoły, ruzynki, płatki migdałów (Jak kiery chce, jo wola nie dodować)
Na poczōntek o proporcjach – tela wiela mo być porcji tela jajec, łeżek cukru i żelatyny. Jak bydzie maszkecić na przikład szejś ludzi, wtedy trza 6 jajec, 6 łeżyczek żelatyny, 6 łeżek wody i 6 łeżek cukru. Ganc proste.
Żelatyna rozpuszczomy w gorki wodzie, do tego dodowōmy kakao i gorzoła jakby sie kiery chcioł trocha ożrać 😉 Fyrlomy.
Ubijomy jajca z cukrym i pomału wlywomy do tego miszōng żelatyny, kakao i gorzoły. Belontōmy po leku, rozlywomy do misteczek i fertich, chlast do lodówki i trza zetwać choby yny te 2 godziny aż styżeje. Proć sie docie do maszkecynio, szpajza idzie se posypać czekuladōm, ruzynkami abo mandlami, co tam kiery lubi.
Smacznego!
