Jako oblyczka se kupić, modro czy lilowo? Jaki kolor farby machnyć na ścianie? A tepich brōnotny eli czerwiony? Kolory majōm znaczyni i onaczōm nasze samopoczuci. Miarkuj!
Lilowy
idzie na piyrszy ôgiń bo je moim ulubionym kolorem. Lilowy to kolor spokoju, ciszy i opaterności… ale też tajemnicy i mistycyzmu. Zocnie rozwijo kreatywność beztuż lubiōm go artystyczne dusze.
Czerwiony
Mój ulubiony zaros po lilowym 🙂 Pobudzo i dodowo energie, zocny kolor do tych co sie czujōm zmorzyni i niecherscy. Ale dejcie pozór, za dużo czerwionego dookoła droźni i tropi po jakimś czasie. Kolor miłości, odwagi i życio – obocz logo Orkiestry Świątecznej Pomocy eli PCK.
Modry
Pomogo sie usiotać bo kojarzy sie z niebym i wodōm. Co ciekawe, zniechęco do jedzynio beztuż jak chcesz stracić woga to jodej z modrych talyrzi. Modry pobudzo wyobraźnio beztuż sie sprzido ludziōm co potrzebujōm kreatywnego natchniynio.
Chcesz co wymyślić? Legni se na łące i zaglōndej na niebo 🙂
Bronotny
Wiklina, zapach ziemi i kory stromów – bronotny kojarzy sie z ziemiōm i naturōm, to je kolor bezpieczeństwa, stabilizacji i komfortu. Dobrze sie takim otaczać w doma.
Żółty
Gorki, żywy i radosny kolor. Machni se jedna ściana w paradnej izbie a bydziesz rady i pełny energii. Ku tymu to je kolor związany z intelektem – pomogo zapamiętywać, rozjaśnio myśli przez co pryndzy idzie podejmnyć decyzje.
Jo przede wszyskim fest lubia żywe, mocne kolory. Żodnych majtkowych delikatnych kolorków, zwłaszcza jak sie tyczy o lōnty. A ty kiery kolor lubisz nojbardzi?
