Knif niby do kobitek, ale myśla że chōpy tyż sie mogōm poratować.
Beztuż że je środek zimy ganc mi sie skóra przesuszo. Moga ciaprać kaj jaki krymy ale mało co sie sprawdzo.
No to wynejdłach zocny knif – olejki!
Fajnie nawilżajōm a do tego som lekki przez co skóra na zicher nie bydzie sie przetłuszczać. No ale skóra to nie wszysko. Skiż tego że z natury mom suche włosy, olejek roz w tydniu to je do mie mus. Poza tym jo dycki chca o sia dbać.
Z olejkami ni ma wiela roboty beztuż babeczki co sie sztyjc śpiychajom i majōm mało czasu na zicher nie bydōm labiydzić.
- Rano nakłodōm olejek na twarziczka i fertich!
- Na wieczór, jak praje nikaj nie ida, cioprza olejek na końcówki włosów i tak se to trzimia pora godzin abo i do rana. Potym myja głowa i tela. Fest rozwijo tymat Alina z bloga Alina Rose. Polecom jak kiery chce wiyncy posztudyrować o olejkach.
- A na rzęsy i brwie nakłodōm olejek rycynowy na chwila przed spaniym i fajrant.
Ni ma wcale moc łonaczynio a rezultaty som blank fajne.
Jo olejki zamawiōm z geszeftu Bio Natural Fit – som blank łacne a do tego kupuja tam też pora inkszych mazideł przi okazji.
Moi sprawdzone olejki
- Arganowy – oprócz nawilżanio zocnie regeneruje skóra i włosy. Tyn marokański olejek mo kupa witaminy E i kwasów omega, fajnie spłyco piyrsze zmarszczki a ku tymu pomogo przy niecherskich paznokciach.
- Z pestek malin – mo naturalne filtry przeciwsłoneczne UVA/UVB. Kapka rozjaśnio skóra i fajnie wyrównuje koloryt. Sprawdzony i potwierdzony na moi własnej gymbiczce 🙂 Wzmacnio i regeneruje a ku typu delikatnie wonio. Jedyn z moich ulubionych 🙂
- Rycynowy – nojlepszy na włosy, rzęsy i brwie. Włosy sie piyknie blyszczōm, som wzmocnione i odżywione. Brwie sie zagęszczajōm a rzęsy fajnie wydłużajōm i som mocniejsze.
- Migdałowy – piyknie wonio! Leciutki, gibko sie wchłanio i superancko nawilżo. Dobrze działo na łamliwe włosy co sie nie blyszczōm. Uwielbiōm! 🙂
A Ty jako se radzisz z suchōm skórą i niecherskimi włosiętami?
at
Świetny artykuł. Dziękuję i pozdrawiam