Na dobre zacznył sie czas urlopów, klary i laby. Jedni pojadōm nad morze, drudzy w góry a jeszcze inksi nad jeziora. Je nojlepszy czas coby dać naszym szłapkōm trocha luzu i niechać zandale w kōncie. Szpacyry po piosku eli dreptani po trowie na zegródce – procno rzecz! Toć że trza zaglōndać pod nogi coby jaki szkło sie nie wbiyło abo coby osy nie nadepnyć ale jak dosz pozór to wszysko bydzie dobrze 🙂 Ôbocz co ci przidzie dobrego z chodzynio po bosoku.
Masaż stóp
Wpływo zocnie na organy wewnętrzne i poprawio ukrwieni. Jak mosz sztyjc zimne szłapki to lyź boso, bydziesz mieć procny, naturalny masaż.
Poprawa samopoczucio
Poszpacyruj trocha bez szczewików to bydziesz widzieć jako sie fajnie poŏnaczy Twój humor 🙂
Zahartowani
Zimno woda wzmacnio organizm beztuż szpacyrek krajym morza poprawi Twoja odporność.
Ćwiczyni uważności
Skiż tego że na stópkach momy moc połączeń nerwowych, przi łażyniu po bosoku fest czujymy nawierzchnia a to nom dostarczo dużo nowych doznań kiere som nieosiągalne jak chodzimy w szczewikach. Momy ganc inksze odczucia i beztuż noreszcie zaczynōmy sie skupiać na tym co czujymy i co nom dowo bezpośredni kontakt z zolōm. Wiyncy o uważności przeczytosz tu.
Relaks
Chodzyni po bosoku rozluźnio muskle i sprawio że generalnie luzujymy. Bele yno sie nie smykać podle pasieki z ulami 😉
Jak cie mierzi coby lotać boso po zegrodzie to choć aby popróbuj doma sebuć lacze i mieć eli tela kontaktu z zolōm. Ôboczysz, bydziesz rady! Jo sie zaros sebuwōm i leca drap na trowa! Sebuj sie też!
