Jako to je z tym kolorym szkutów? Blondynki gupiutki ale szwarne, brunetki ogarnyte ale za fest poważne, ryszawe wredne i niewierne? Pierucha, skōnd sie wziyny te dziwaczne duperszwance?
Blondi, ahhh blondi…
Zaczło sie już za starego piyrwka. Fest dawno tymu kaj jaki boginie miały blond włosy – obocz Wenus, gryfno kobitka ale z niemondrōm gymbōm, coś z rozumym choby na bakier no ni? Nieskorzi w filmach taki kobitki jak Marlena Dietrich, Marilyn Monroe czy Brigitte Bardot omajlant grały role piyknych gupków co to sie uśmiychajōm szyroko ale jak sie odzywajōm to rozumu nie uznosz.
Blondynki som uznowane za szwarne i kobiece ale gupi i zbałamoncone. Nawet lalka Barbie mo przeważnie blond włosięta ale niemōndro gymba, szykowne ksiynżniczki z bajek podobnie, co jedna blondi to szwarniejszo ale żeby to było aby trocha ogarnyte…
Ryszawi też ni majom leko
Już od fest starego piyrwka rude kojarzyło sie z pechym i wybrykiym natury. W starożytnym Egipcie zaczły sie piyrsze prześladowania, potym Greki se wymyślyli że rudzielce po śmierci onaczom sie w wampiry. W średniowieczu było yny gorszy – ryszawe kobity polyli na stosach. Potym Hitler zakozoł rudym sie rozmnażać coby nie przekazywali pofyrtanych gynów.
Wziyno sie to skuli tego, że rude kudły bierom sie z rzadkigo miszonga genów a że piyrwyj jak co było rzodki i odstowało od reszty to było złe. Potym do ryszawych dorobiyło sie roztomajte gupawe teoryje i tak to teroz wyglōndo.
Dobrze że terozki do rudych nie strzylajom z luftbiksy!
Jo i amerykońscy uczyni godōmy że to wszysko som gupoty i kolor szkutów ni mo znaczynio
Nasze rozumy nasfol nas robiōm za błozna coby se yno świat jako poukłodać. Beztuż nom sie zdo że ryszawe to taki, blond owaki…
A tak rychtyk czorne, blond czy ryszawe… wszyski som piykne!
at
Biologicznie kolor włosów oczywiście ni mo żodnego wpływu na charakter czy zachowani kobity, aczkolwiek czasym sie widzi, że jakoś te blondynki (myni lub bardzi świadomie) rżną głupa albo ubierają sie na różowo, tak jakby kolor włosów zobowiązywoł 😉