Tak rychtyk idzie tymu zaradzić.
1. Podstawowo rzecz – trza sie porzōndnie wyspać. Jak człowiek je niewyspany to przez to robi sie zmierzły i bele co go nerwuje.
2. Ubier sie wygodnie coby Cie nic nie szpanowało i pamiyntej coby wziońść se do tasze klamoty kiere bydziesz potrzebować. Potym człowieka mierzi jak se czego ważnego zapomni.
3. Weź se muzyka co rada słuchosz, ciekawo ksiōnżka kiero Cie wciōngnie, krzyżówki, gry – onacz co konkretnego coby nie rozmyśliwać o locie.
4. Ocyń czego sie tak rychtyk boisz, turbulencji? Że fliger spadnie, rozwali sie na pół abo że jaki dinks nie bydzie fungowoł? Jak już se zmiarkujesz co Cie szteruje pryndzy se to „oswoisz”, logicznie wytłumaczysz i sie kapniesz że to som duperszwance i tak naprowda nic Ci nie zagrażo.
5. Pogodej se z kim to czas Ci pryndzy zleci. Jak ni ma żodnego kamrata z Tobōm to zagaduj pasażerów, a nuż sie okoże że kiery eli mo co ciekawego do pogodanio.
6. Jak już nie umisz se dać rady i dali mosz strach, łobal se jaki alko. Nie godōm coby sie ożrać bo to gańba i bydōm problymy ale lampka wina abo dwie mogōm rychtyk pomóc jak mosz dostać hercklekotów ze strachu.
Pora faktów o furganiu
- Zanim jaki fliger zacznie lotać, musi przyjść moc kaj jakich wysztudyrowanych testów, kożdy aji nojmyńszy wihajster musi fungować. Kabociorzów ni ma, żodyn by sie nie powziōn dopuszczynio do lotanio fligra z jakim felerym.
- Potym jak już se fliger loce, sztyjc go sprawdzajom czy aby wszysko dobrze teguje. Godōm Ci, żodno linia lotniczo nie szpyndlikuje na bezpieczyństwie i nie chciałaby coby jeji fliger lotoł felerny.
- Kożdy pilot je fest doświadczony, coby lotać fligrym z ludziami musi mieć wylotane moc godzin. Do tego pilot musi mieć kupa roztomajtych licyncji i musi jednako sztudyrować, odnowiać te licyncje i przechodzić moc badań.
