Moc sie nasłuchałach o Kapuścińskim, zdało mi sie że cołki świat coś czytoł yny nie jo. Beztuż postanowiyłach nadrobić moi zaległości i ustoć z byciem takim ignorantym. Zaczłach od „Szachinszacha”.
Ksiōnżka opowiado o dziejach Iranu z drugi połowy XX wieku za czasów reżimu pofyrtanego szacha Rezy Pahlavi
Ale po kolei. Zaczło sie od destabilizacyje Iranu, za kierōm jak dycki stoły Stany Zjednoczone. Amerykońcōm nie było na ryka że ichniejszy szach (inakszy król) Mossadek, chcioł sie odetnyć od Zachodu i fest niekorzystnych do Iranu umów na dostawa ropy. Stany wysłały do Iranu agentów CIA kierzi narobiyli moc ôstud i mecyjów w Teheranie i yntlich w kraju doszło do zamachów stanu i po roztomajtych niecherskościach na czele Iranu stanył Pahlavi, protegowany USA kiery tańcowoł jak mu Amerykońce kozały.
Autor opisuje niecherski, pogupawe rygierowani dyktatora, kiery zamiast ônaczyć tak coby było lepszy, doprowadziył do epnej utropy w kraju i pogłymbianio sie niydoli Irańczyków. Kabociorz zamiast dbać o swój kraj, omajlant wyciepowoł gelt na darymne zbrojynia i armia. Robiyły sie srogi nierówności w społeczyństwie – elity i ci co rygierowali pławiyli sie w luksusach, a ludzie na wsiach jedli trowa i szarańcza coby przeżyć. Ku tymu doszły pieroński szterowania ludzi przez tajno organizacja reżimu – Savak, kiero porywała i torturowała zwykłych, ganc ajnfachowych obywateli coby zastraszyć reszta społeczeństwa. Krwawo…
Kabociorz tak niechersko rządziył krajem że Irańczycy w końcu nie strzimali i zaczły sie strajki i breweryje. Kożdo macnifestacja kończyła sie krwawōm masakrōm… Autor zapodowo wstrząsajōnce, mocne opisy dramatycznych wydarzyń.
Polecōm tyn reportaż wszyskim ciekawym świata, dobrze mieć rozeznani o tym co sie dzioło na Bliskim Wschodzie ganc niedowno tymu.
A Wy coś czytaliście od Kapuścińskigo? Kiery coś poleco?
at
moja sugestia „Cesarz”