Z Pepikami miałach do czyniynio od starego piyrwka skiż tego że urodziyłach sie kole czeski granice. Do Ostravy jeździyło sie na szpas na Stodolnia, w Bohuminie robiylimy zakupy całom familijōm a do Frydka Mistka my wybywali na zapiekano kyjza z chranulkami i tatarskōm omáčkom. Teroz też dojś czynsto bywōm za naszōm czeskōm granicōm coby polotać na paralotni, Stodolnia to już teroz ni ma żodno frajda do mie.
No i co ciekawego sie wywiedziałach o Pepikach przi tych wszyskich małych rajzach?
Piwo
W Czechach sie słepie moc piwa, to sie widzi na piyrszy rzut ślypia.
Statystki podowajōm że Pepiki pijōm rocznie nojwiyncy piwa ze wszyskich nacyjów we świecie!
Na osoba wychodzi kole 170 litrów na rok. Majōm zdrowi te nasze somsiady…
Kofola
W Czechach majōm nojlepszo brauza – Kofola. To je taki zelter podobny do coli ale myni słodki i bardzi kwaskowaty. Kofola już mo praje 60 lot beztuż poradziyła sie ganc zadomowić w Czechach. Jak żech yny je u Pepików to Kofola na orzyźwiyni to je mus! Mniam!
Obyczaje
Pepiki som bardzi bezpruderyjni niż Poloki. W górach na dekach frele rozbierajōm sie do bisynhaltra i badków, w miastach pary mamlajōm sie namiętnie na ulicach a z wielkich billboardów spoziyrajōm sagi frele w wyzywających pozach.
Już za bajtla mie zastanowiało jako to je że styknie przejechać dwajścia kilometrów na połednie i tak fest zmiynio sie krajobraz i obyczaje 😀
Kuchnia
Pepiki to som mięsoki, ku tymu jedzōm tłusto i cienżko. Jak eś je praje na diecie to ni mosz po co jechać do Czech 🙂 Przi pytaniu o gymiza ku obiedzie Pepiki robiōm oczy jak piyńc złotych i w nojlepszym razie dociepnōm Ci ku knedliczkom pół tomaty i konsek ogórka. W kuchni czeski królujōm też brambory – po naszymu zimioki. Czy to knedle, placki czy roztomajte buchty – bez bramborów sie nie obydzie.
Religio
Czechy som jednōm z nojbardzi ateistycznych nacyjów Europy. Kościołów u nich jak na lykarstwo a w niedziela już prawie żodyn nie loce posłuchać co też farosz mo dzisio dziwnego do podżistanio. Teroski tak je skuli historie – Karol IV, Jan Hus, oświeceni, rewolucja francusko i na końcu prezydent Masaryk – no i momy ateistyczne Czechy.
A na koniec coś o czym nojpewniyj nie wiedziołeś.
W Czechach wynojdli… kostki cukru!
A Ciebie co ciekawi u naszych somsiadów – piwoszów?
