Przajecie tłumom na szlakach w górach? Ja? To nie jedźcie w Tatry Niżne 😉
Spani miałach obsztalowane w Chacie Magurka, blank pojszodku Tater Niżnych, cołki w głuszy, w malućki wiosce pojszodku lasa
Moi klimaty! Szlaki odchodziyły spod domku przez to nie trza było nikaj jeździć yny wylyźć z chałupy i heja do lasa! A jaki 600 metrów wyżyj zaczynała sie grań kiero kludzi przez całe Tatry Niżne z kulminacjōm na górze Dumbier (2043 m npm).
Piyrszy dziyń zacznył sie dojś dziwnie. Z samuśkigo rana spotkałach na szlaku jakigoś grzibiorza.
Panoczek sie zdziwiył że jo chodza po górach sama i zacznył fandzolić że przeca tu som niedźwiedzie!
Nie boja sie tak sama po lasach szwyndać? Zaśmiołach mu sie w nos i padałach że pewnie co nejwyży wiewiórka spotkōm. Ale dyć yno uszłach trocha i wyobraźnia zaczła robić swoi. A co jak tyn stary purt mo rycht?
Misie w górach to żodno nowość, ludzie czasym wciepujōm filmy na jutuba jak to niedźwiedzia widzieli przi szlaku. Co zrobić jak spotkōm jakigo misia?? Ciepnyć klapsznita żeby sie doł do tego a jo w tym czasie… na strōm? Bezmała niedźwiedzie poradzōm wlazować na strōmy ganc sprawniyj niż ludzie… Hmmm… A monej tyn pieroński chłop chcioł mie za błozna zrobić i nasfol chcioł wylynkać?
I taki to rozmyślania sie mie trzimały bito godzina. Moc sie nachodziyłach po górach za żywota ale nigdy sama, beztuż jeżech nie prziwyknyto. W końcu stwierdziyłach że trefi mi sie wracać, tak źle mi sie szło. Ale przidarzyło mi sie i dojrzałach ludzi kōnsek dali. No to jo w te pyndy, ruszyłach pryndko przedsia coby wreszcie sie poczuć trocha bezpieczniyj. Potym już było fajnie…
Na grani piykne widoki, przestrzyń i spokój. Nikiedy aż dzwoniyło w uszach z tej ciszy – super rzecz!
Miałach dobre tympo, szło mi sie dobrze to i trasa sie zrobiyła zacno – przez Chabenec i Kotliska aż po Skalka (1980 m npm). Na wieczór cało, zdrowo i uradowano doczłapałach do chatki, już mi sie aji śmioć chciało z tego gupigo strachu z rana. Tako staro a jeszcze sie do zbałamōncić!
Na drugi dziyń poszłach se ganc w drugo strona – kierunek Velka Chochula
Niestety w pogodzie stoło że po połedniu mo fest padać. Beztuż śpiychałach sie rano i zaś miałach fajne tympo na szlaku. Chmury na niebie straszyły i leko obcyrklowałach że rychtyk bydzie padać. Ale nic to, maszyruja przed sia!
Pogoda jako tako sie utrzimała przez pora godzin, nawet było lepszy niż piyrszego dnia bo nie było hycu. No ale w końcu dopod mie deszcz. Jo sie tam wody nie boja, jak se w górach sipi to idzie strzimać. Ale jakby sie trefiyła jako ulywa to niewesoło. Beztuż stwierdziyłach że pomału trza zawracać. I tak to wszysko wisiało na włosku, w okolicach rōncz widziałach jak leje to tu to tam. Przi schodzyniu zaś mie chyciył deszcz ale co tam!
Za chwila już siedziałach w krzach i pocieszałach sie borówkami
Moc ich tam było, widać że żodyn nie wyzbiyroł.
Fajne górki z tych Niżnych Tater, człowiek sie dużo nie zmorzi przi chodzyniu, widoki przepiykne a ku tymu mało gawiedzi na szlakach.
Polecom!
