Dzisio byda dali rozprawiać o moi ostatni rajzie.
Atrakcji turystycznych w Nepalu jakoś nie odnotowałach, mom wrażeni że tam sie jedzie coby pochodzić po górach, lotać na paralotni abo poczuć tyn jedyny w swoim zorcie, miejscowy klimat. Oboczylimy pora miejsc turystycznych i jedyne co mi sie spodobało to był klasztor buddyjski.
Klasztor buddyjski Matepani Gumba w Pokharze
Praje my se trefiyli na zajęcia koszykówki młodych mnichów.
Potym wleźlimy do świątynie kaj zastała nas cisza i spokój. Jedyn mnich zacznył nom opowiadać historyja tego klasztoru a akompaniowały mu przeciągłe dźwięki jakigoś rogu z placu. Nieziemski klimat sie zrobiył, totalnie odrealnieni w otoczeniu buddyjskich posągów ociekających złotem. Niezwykłe…
Potym młodzi zaczli sie pomału zbiyrać na wieczorne zajęcia i musielimy wylyź ze świątynie. Nasz mnich był fest miły i odprowadziył nas do wyjścio po czym sympatycznie sie pożegnoł. Wreszcie żodyn nie chcioł geltu za to że był miły i poświęciył nom czas…
Co tam pojodajōm w Nepalu?
Jak sie rozchodzi o jodło to nojważniejsze nepalski dani to dhaal bat – ryż z roztomajtymi dodatkami – soczewicōm, szpinakiem, ostrōm zołzōm itd. Zajodałach sie też wegetariańskimi pierożkami momo, toć że z sosem chili! Czynsto jadłach też chapati – cienki placki pszynne. Do tego szło dostać roztomajte potrawki warzywne abo miysne, co kiery woli.
Beztuż że wszysko było taki ostre, na poczōntku miałach płaczki w oczach jak co jadłach. Ale na koniec wyjazdu nie było mowy coby nie obsztalować ryżu na ostro! Teroz jakoś jak jeżech nazot w Polsce to wszysko sie zdo taki płone że używōm dziynnie sosów chili do ôbiadu.
W Nepalu wolałach miynsa nie jeść skiż tego że warunki w jakich nom to jedzyni szykowali były przinajmniej opłakane… Rōncz kieryś sie zatruwoł i trza było sie ratować a to medykamentami a to rumem na wieczór. Jakoś specjalnie nie przepadom za roztomajtymi gorzołami ale nie było wyjścio – trza było zabić wszyski bakteryje coby też nie zalegnyć i nie mitrynżyć czasu na wyjeździe.
Nepal to je naprowda wyjątkowy kraj. Polecom wszyskim co sie chcom oderwać od europejski rzeczywistości i przeżyć, odczuć coś ganc inkszego! Teroz Turkisch Airlines, Qatar Airways i Emirates ostro rywalizujōm ze sobōm i widza że je kupa łacnych lotów do Azji z Europy eli też z Polski. Kiery yny może niech leci sie odrealnić! 🙂
