Oj, sie dzioło! Rajza do Nepalu była ganc najciekawszo ze wszyskich moich wypadów do tej pory. Już pora dobrych lot moi urlopy to som wyłącznie wypady paralotniowe no i nie inakszy było tym razym.
Do Azje wybrałach sie z grupōm ludzi na seminarium przelotowe onaczone przez Michała Gierlacha, naszego paralotniowego mistrza Polski. Lot mielimy z Berlina z przesiadką w Stambule. Ze stolice Nepalu, Katmandu, busem pojechalimy do Pokhary. No i sie zaczło 🙂
Warun dopisoł i lotani było ciyngiym dwa tydnie dziyń w dziyń
A w lufcie widoki na Himalaje! Moc sie nauczyłach i wreszcie zaczłach odrywać sie od górek! Moi piyrsze przeloty 🙂 Wieczorami siodalimy w kupie i Michał prowadziył wykłady i omawioł nasze loty. Synek mo kupa wiedzy i je mega dobry. Chylić czoła! 😉
W powietrzu po starcie dycki było gęsto – aż rojyło sie od tandymiorzy z chińskimi turystami. Coby nie dostać hercklekotów trza było dziwoczyć i gibko citać z tego ukropu i dali go, na grań i potym przeskok w strona Himalajów. W samych Himalajach my nie lotali, dementuja klachy bo już nieroz znajomi mie napasztowali jako to je lotać na paralotni w takich wysokich górach 😀
Durch ciekawōm rzeczōm było furgać z sępami
W Hiszpanii też były ale jednak w Nepalu było ich dużo wiyncy. Ptaszyska na szczyńsci były przijazne i fajnie markowały termika.
Kupa przigód było na tym wyjeździe
Jak tak człowiek wylonduje kaj fōrt i trza wracać, a to busami a to jeepami, to sie kupa dzieje eli idzie sie moc naoglōndać. Nepalczycy na szczęści som mili, przyjaźni i nie habią. Ale bez czekulady cie nie puszczą, o ni 😀
„Give me chocolate!” – naczelne hasło kożdego bajtla co mie dopōd po lądowaniu
Bandipur
Na dwa dni pojechalimy na wycieczka do miejscowości Bandipur. Tam było lotani na żaglu i pochwola sie że wygrałach piwo za najdługsze utrzymani sie w powietrzu bo akurat warun był słaby i trza było sie moc nastarać 🙂
Miejscowość była malutko i uroczo, jakoś za fest nie przypominała Nepalu. Niestety nie do wszyskich wycieczka okozała sie tako zocno – nikierzi struli sie jedzyniym i ani rum na wieczór nie poradziył. Jo na szczęści cały wyjazd jako tako sie ostołach.
Trzeci świat…
Trza prziznać że Nepal to je jednak ganc trzeci świat… brudno i biydnie, aż nieroz przikro sie zaglōndało na to w jakich warunkach żyjōm ludzie… Naoglōndałach sie biydy w tym kraju…
Umazane bajtle w poniszczonych lōntach i szkarbołach to był widok kiery towarzyszył nom codziennie. Smutno sprawa… Ale z drugi strony te same dziecka były uśmiychnyte, wesołe i miały milion pytań na minuta. Dobrze że w tym wszyskim te bestyjoki zachowujōm pogoda ducha…
Coby trocha wspomóc tyn biydny kraj zgłosiyłach sie do jednej organizacje, Karma Flights, z darowiznōm. Praje som w trakcie rozdowanio ciepłych lōntów ludziom na wioskach w górach. Poza tym uczestniczōm w budowie trzech szkół w okolicy Pokhary. Mom nadzieja że trocha wspomogłach szkolorzy 🙂
Narazie tela, zaś hned bydzie drugo część wpisu.
