Fliger miałach do Malagi a stamtōnd grupōm my sie przeniyśli do Algodonales, malućki uroczej miejscowości przi górce z kierej idzie zocnie polotać na paralotni. Bo toć że wypad był paralotniowy, inkszych rajzów narazie nie planuja bo se chca sezon odkuć. Powiym Wom że skuli roztomajtych starości to mało lotałach w tym roku. Za mało!
Na połedniu Hiszpanii pod koniec października było blisko 30 stopni w dziyń
Dobrze że miałach krótki galotki 🙂 W tym momyncie trza by przesłać wyrazy współczucio do wszyskich co byli wtedy w Polsce bo z tego co wiym pogoda była u nas fest oszkliwo. Beztuż jo wola jechać kaj na jesiyń i sie jeszcze wygrzoć a lato dycki przesiedzieć w Polsce.
Lotani my mieli prawie cołki tydzień, yno ostatnigo dnia za fest wioło to my pojechali se pozwiedzać miasteczko Ronda, piyknie położone na kraju wąwozu. Potym my pojechali obejrzeć malućki miasteczko co sie zwie Setenil de las Bodegas. Mało kiery o nim wiy a je blank fajniste – wszyski domki som biołe i do tego część je wykuto w skałach.
Przez miasto idzie szlak – Ruta de los Pueblos Blancos – co sie tłumaczy jako droga biołych miasteczek. Jak kiery lubi sie stracić w wąskich klimatycznych uliczkach przesiąkniętych hiszpańskim klimatym to niech zaros uderzo w te strony.
No ale mie tam zwiedzani już za fest nie rajcuje…
Smolić te wszyski perły architektury! Tak nojbardzi to mi sie rozchodzi o lotani, to mi dowo nojwiyncy radochy i tak wola spędzać czas.
Lotali my przi górce z kierej szło startować na wszyski strony, zależnie od pory dnia i kierunku wiatru. Było wszysko – termika, żagiel, szło sie puścić na przelot do wspomnianej Rondy abo do pobliskich górek – Twin Peaks. Widoki zachwycały!
No i ta cisza w powietrzu, w końcu nic nie trza godać
złowiek je som ze sobōm 2 kilometry nad ziemiōm – wspaniałe przeżycia.
Ale dyć – jak je terma to spokojnie ni ma i trza zaciś zęby. No ale taki spokojny żagielek na wieczór przy zachodzącym słońcu – hoho, coś cudownego! A wiela satysfakcje jak sie udo utrzimać w powietrzu a inksi siodajōm jak muchy 😀 Dupa w kraglu, zerka też trza kryńcić moi drodzy 😛
Na wieczór my se wszyjscy chodziyli na ryneczek posiedzieć i zjeś co w końcu, przeważnie kożdy był głodny jak wilk skuli tego że my tak nieskoro byli nazot. Jak kiery lubi owoce morza to by był blank zadowolony. Jo tu sie nie byda nad tym rozwodzić, bleeee…
Przi okazji – pozdrowiynia do kochanej Agatki z Wrocławia 🙂 Trefiyły my na sia na lotnisku w Maladze, potym nas usadziyli w jednym pokoju i tak my sie to trzimały razym już do końca wypadu.
Do zobaczynio w powietrzu!
