Beztuż że zacznył sie ganc świąteczny czas pogodōm Wom jako to obchodzymy święta u nas w doma.
Dycki stroimy gelyndry i stromy przi domu coby był fajny klimat
A to lampki, a to stroiki czy kaj jaki kolorowe migoczące ozdoby. Na wieczór rożygomy te wszyski światełka i robi sie rychtyk fajniście 🙂
Potym doma – no dyć, choinka musi być! Dycki je fest strojno i szykowno, a na wyrchu szpica. Raczyj momy sztuczny stromek no bo komu by sie chciało lotać do urzędów i zgłaszać że se chcymy wytnyć choinka ze swoigo własnego placu…
W Wilijo od rana szkłodzimy w kuchyni
Mama dycki chce coby było moc futru beztuż robota wre i ni ma chwile coby se dychnyć. Do stoła siodōmy jak już je ćma i wszysko gotowe, nigdy my sie nie obracali czy je jako gwiazda na niebie czy ni. Ale gelt pod serwet zawsze wrażujymy coby sie darzyło w prziszłym roku.
Teroz ciekawo rzecz – na Wilijo dycki momy zupa z zielonego groszku. Wszyjscy sie dziwujom co to za zwyczaje ale tak to właśnie u nas je pod czeskōm granicōm. No i moczka – tako bryja z piernika z roztomajtymi bakaliami. Tymu to jo ganc nie przaja ale mama lubi beztuż moczka to je mus.
Po wieczerzy lecymy do choinki oboczyć co też my dostali od dzieciątka. Fusekle a parfiny to je mus 😀
Te święta bydōm inksze bo już nie bydzie z nami Fatra. Na zicher bydzie kupa wspominek no ale myśla że zo wizo bydzie fajnie, dychnymy se wszyjscy i sie objymy tak, że rōncz trza bydzie mięta parzić. A smutki precz!
Udanych świąt wszystkim!
