Powiym Wom że jo to fest przaja rajzōm. Jak yno mom wolne to migym sie pakuja i jada! Nojbardzi mi sie podobo w górach. Świyży luft, ptoki śpiywają, wszyndzi strōmy, zielono i ni ma butlu. Oprócz chodzynio po górach też loca na paralotni ale o tym nieskorzij.
A czamu jo tak przaja smykaniu po świecie?
1. Lubia jak je ciekawie i jak mom co fajnego rozpamiyntywać. Nie umia usiedzieć długszy czas w jednym miejscu.
2. Dycki chciałach poznować świat i jak teroz odkrywōm te wszyski zocne miejsca to czuja że spełniōm marzynia z czasów za bajtla.
3. Poznowōm sama siebie.
4. Rajzy fest rozwijajōm. Poznowo sie inkszych ludzi, kultury i zwyczaje. Człowiek robi sie mōndrzejszy.
5. Oglondōm widoki tak piykne że aż bałamoncōm! Aji nikiedy mom płaczki w oczach…
6. W czasie rajzy człowiek uczy sie rozwionzywać problymy kierych by ni mioł jakby se zgniyły siedzioł na tapczanie przed pudłym.
7. Jak sie na urlopie tela dzieje to dni sie zdajōm długsze. Zamiast tydnia sie zdo że to były i ze trzi!
Tela yno że jak człowiek przijyżdżo z taki rajzy to je kompletnie ściorany i trocha mijo aż dońdzie do sia. Ale to nic, ajnc momynt i już je dobrze! Dwa dni w robocie i już by sie chciało kaj wybyć i podychać fajnym luftym.
Świat je piykny! Nie szpyndlikuj na rajzach bo to som rzeczy kiere sie potym pamiynce przez długi lata!