Dzisiej byłach świadkiym jak auto małowiela by nie potroniyciło jakijś frelki co to szła zagodano z telefonym, ani sie nie obejrzała na boki czy co jedzie yno sie wyrychlyła przedsia i wlazła na droga. Pierucha! O mało by jom to auto nie rombło, facet hamowoł na szlag.
Droga je do aut a nie do tych co chodzōm piechty
Na pasach kaj ni ma świateł to auta majōm mieć piyrszyństwo a nie piesi. Już godōm czamu.
- Auto mo trudniyj sztopnyć. Człowiek yno przistanie i fertich a coby auto zasztopować trza sie dużo wiyncy nastarać. A jak sie jeszcze kiery zagapi za kierownicōm to przeca wypadek gotowy!
- Auto kiere zaczyno przyispieszać kopci i je nieekologiczne. Włażyni na pasy bez pomyślunku fest paskudzi środowisko.
- Auto jak zwiykszo pryndkość zżyro paliwo no i ludzie tracōm gelt bo co chwila trza jechać na tanksztela zaś naloć do baku.
- W miastach robiōm sie korki jak rōncz trza sie zatrzimywać przi kożdych pasach. A wiela czasym trwo aż sie auto rozkulo…
- Ryć sie na pasy je niebezpiecznie bo jak jedyn na gwołt hamuje to drugi mu może leko wjechać do zadku.
Sama kupa chodza do roboty piechty, w jedna strona mom 35 minut pryndkigo szpacyru. Jakbych sie tak ciyngiym lazła na pojszodek drogi bez pomyślunku to by mie w końcu kiery potrōnciył i tela by było. Dejmy wszyjscy pozór i nie ryjmy sie na pasy do własnego dobra!
