Zima prziszła, wylyź z doma sie nie chce… A to padze, a to wieje – ni ma komu lotać na fitnesy. Ku tymu świynta idōm no i kiery mo czas na taki gupoty?
Ale jo godōm że trza sie brać za sia coby nie ciynżeć! Yny jako to zrobić jak sie nie chce i „ni ma czasu”?
Co robić coby nom wyszła akcja „Gryfny brzuch i zocny zadek”?
- Piyrsze co – nastow sie pozytywnie i uwierz że sie udo. Bez entuzjazmu bydziesz ale ćwiczyć – jak wilijo w maju trefi!
- Kolorowo mata, gryfno oddychajōnco bluzka w ulubionym kolorze, skokanka kiero ci sie tak spodobała w geszefcie… otocz sie maszketnymi rzeczami kiere zachyncōm cie coby sie zwlyc z szezlonga.
- Roztomajte, urozmaicone ćwiczynia – nie rób sztyjc jednego a tego samego. Roz, że efekty nie bydōm szałowe a dwa, że wpadniesz w rutyna i ci sie gibko zmierznie.
- Prziklej se na ajsszrank motywujōnce cytaty i knipsy, niech piykny brzuch innej fitneski szteruje cie coby zająć sie własnym!
- Do ćwiczynio puś se ulubiono, energetyzujōnco muzyka, to je mus! Żodnych smętów!
- Ćwicz do kupy z chōpym jak jakigo mosz, eli zaproś koleżanka na ćwiczenia cuzamyn. Dycki ciyżko sie ćwiczy jak kieryś siedzi wygodnie na zeslu i jak trza sie samymu pocić…
- Wynokwiej małe cele, np. tygodniowe zamiast miesiencznych. Jak bydziesz widzieć efekty to motywacja bydzie gibko wiykszo i sie nie zniechęcisz.
- Dycki miarkuj jako sie czujesz po treningach. Pełno energii i rada z siebie że sie udało co? Jak chcesz sie zaś tak poczuć to wbijej na mata!
Czaaaduuu! Trzimia kciuki!