Ni, to nie bydzie wpis o czekuladzie i bombōnach 🙂
Jak chcesz utrzimać poziom energii na zocnym poziomie to miarkuj.
Dobre węglowodany, czyli te złożone
Piyrsze co to:
- pełnoziarniste nudle
- kasza
- brązowy ryż
- haberfloki
- ciymne kakao abo ciymno szekulada
Ku tymu kaj jaki owoce bo one też majōm moc złożonych węgli. Te dobroci sprawiōm że energia bydzie sie uwalniać po leku i bydziesz ganc długo czuć sie pobudzony.
Tryptofan
To tajemniczo brzmiące białko kiere przi trowiyniu przeonaczo sie w serotonina – hormon szczęścio. Zocnym źródłem tryptofanu sōm banany kiere ku tymu majōm moc magnezu. Oprócz bananów kupa tryptofanu majōm też ziorka banie, awokado, ryby i jajca.
Kwas foliowy
Procnie działo na układ nerwowy i pomogo rozprawić sie ze ścioraniym. Niedobory sprawiajōm że licho sie czujymy i nastrój je marny. Kaj idzie znejść kwas foliowy?
Ano w gymizach:
- szpinaku
- groszku
- szałocie
- sznitbonach
- brokułach
- brukselce
Ku tymu jeszcze w tomatach, jabłkach i apluzynach.
Magnez i witamina B6
Tu chyba nie trza za wiela szlabikować, jak mosz niedobór jednego i drugigo to żeś je niecherski, zmierzły i źle śpisz. Polecōm kiełki, ryby, kaj jaki orzechy i uzaś banany i gymiza 🙂
Kwasy omega
Wiedziołeś że wzmacniajōm układ nerwowy? Pomogajōm na deprecha i stany lękowe a ku tymu regulujōm huśtawki nastrojów. Te nienasycone kwasy znojdymy w mandlach, rybach morskich, oliwie z oliwek i siemieniu lnianym.
Dbej o sia! To co jysz je fest ważne coby być zdrowym i radym z życio!
