Mosz też tak, że rady byś wiyncy zarobioł ale cie fest mierzi coby iść do szefa i mu szwandrać czamu ci sie noleży tela i tela? Wolisz machnyć rękōm a mieć świynty spokój i sie nie tropić? Morzi cie jak mosz sie zebrać i zagodać do szefa? Niiii, tak ni może być! Nie odpuszczōmy! Jak nie spróbujesz to psińco bydziesz mioł. Gelt szczęścio nie dowo ale dycki tymu szczęściu pomogo.
Jako se ta podwyżka nasztelować?
- Pyrsze co to wyluzuj. Jak bydziesz znerwowany i spięty to godka wyńdzie nieszczerze i niezręcznie. DYCHEJ. Głęboki oddech dycki ratuje. Rachuj do dwadziestu, to tyż pomogo.
- Narychtuj se konkretno lista swoich osiągnięć i nojlepszy pokoż to w cyfrach. Ogólniki żodnego nie przekonajōm, trza być szczegółowym.
- Używej liczby mnogi, np. „osiągnylimy„, „nasza firma„, „momy dobre wyniki„. Zocnie jak sie identyfikujesz ze swoim pracodawcom i z tym co robisz.
- Znosz mało wiela swoigo szefa. Pokombinuj co za argumenty może mieć coby Ci nie dać podwyżki. Na wszysko narychtuj odpowiedź tak coby sie nie dać.
- Jak wiysz że zarobiosz myni podle średnij Twoigo zawodu w Twoim regionie to zaros o tym godej! Nie słuchej duperszwanców że firma musi tnyć koszty. Teroz je czas pracownika a nie pracodawcy. Firm je moc a zocnych pracowników mało.
- Twój szefunio najprawdopodobniyj bydzie z Tobom dżistoł i próbowoł wycyrklować tak coby obniżyć stawka. Beztuż zawczasu podej kapka wiyncy tak coby mieć z czego potym zyńść.
- Nie skokejcie se do ślypii bo to jeszcze nigdy nikomu nie pomogło. Po leku, nie nerwowo a bydzie dobrze.
Ni ma sie co sztresować bo tak rychtyk Twój szef kejsik też był w ganc tej samej sytuacji i też próbowoł nawynokwiać wiyncy geltu.
Próbuj! Powodzynio i trzimia kciuki FEST!
