No i momy drugo czyńść moji listy procnych rzeczy kiere dziynnie robia.
Miarkuj
7. Czytōm choby yny jedyn motywujōncy pozytywny artykuł dziynnie. Aji o pozytywnym myślyniu, aji o wdzięczności abo o… czyijś rajzie do Chile, Kanady czy na Alaska.
8. Szlabikuja rzeczy za kiere jeżech wdzięczno. Mom taki specjalny heft do tego i jak mom chwila to sie biera za pisani. W tym moim zocnym hefcie zapisuja tyż roztomajte procne cytaty mōndrych ludzi coby mieć pod rękōm jak mie nańdom smutki.
9. Starōm sie zagadywać znajomków – naszrajbuja mejla, pisza na fejsie abo dzwonia. O fajnych znajomych trza dbać!
10. Na wieczór, dycki jakoś tak przed spaniym, siodom se na chwila i starom sie dychać i o niczym nie rozmyślać. Zwoł jak zwoł, czy to je medytacjo to jo nie wiym ale pomogo mi to w wyciszeniu.
11. Jak już se legna do spanio to wyliczōm zocne rzeczy kiere mi sie przitrefiyły bez dziyń. To mogōm być aji nojmyńsze drobiazgi: zjadłach ciepły obiod, kumpela z roboty prziniosła mi apluzynka, było trocha słońca za dnia, na treningu było fajnie, dzwoniyła moja siostra – cwiling… moc a moc tego je i szłoby kupa czasu tak wynōkwiać.
Cołki czas sie starōm, to ni ma tak że blank wszysko mi idealnie wychodzi. Nikiedy je taki dziyń że mom wiyncy negatywnych myśli i trudniyj mi sie skupić na pozytywach. Ale sztyjc próbuja i próbuja, nie poddowom sie bo wiym że praca nad sobōm je ciyżko ale sie spłaco. I jak sie co tak dziynnie robi, to hned to wlezie w nawyk i już tak zostowo. Yno sie nie idzie zrażać na poczōntku. Polecom ogromnie kochani moi!
